Protestantse Kerk
Trochgean nei de haadynhâld
Fynplak fan leauwe, hope en leafde
subline-curl
Tsjinstboek

Earste snein fan Advint

Pears

Gebed fan ’e snein (jier A-B-C)

Kom oer mei macht, o God

en kom nei ús ta,

rêd ús út de gefaren

dy’t wy sels oproppen hawwe

en hâld om ús hinne

jo beskermjende hannen.

Gebed fan ’e snein

Jo,

dy’t wurden fan ûnthjit hawwe

foar minsken dy’t longerjend útsjogge

nei jo kommen,

lit har de frede

dêr’t de wrâld op wachtet,

neieroan bringe

en lit ús sa fernimme

wa’t Jo foar ús binne,

hjoed en alle dagen dy’t komme.

Amen.

Eingebed

God fan Jakob,

lit ús ferrize út ’e sliep

en lit ús gean yn jo ljocht

om de dei te begroetsjen,

dat Hy ferskynt,

dy’t yn eigen persoan

jo ûnthjit fan frede is:

Jezus, de Minskesoan,

dy’t ús ta it libben liedt,

hjoed en alle dagen dy’t komme.

Amen.

Gebed fan ’e snein

Hoeder fan minsken,

meitsje ús net beskamme

as wy fol ferwachting útsjogge

nei jo ferskinen ûnder ús.

Iepenje ús de eagen

foar it teken fan jo trou

dat Jo ús toane yn Jezus

yn wa’t Jo ûnder ús wenje wolle,

hjoed en alle dagen dy’t komme.

Amen.

Eingebed

Skepper fan minsken,

lit it wurk fan jo hannen net los,

mar jou dat wy Jo kenne

as Jo foar ús steane

en jo antlit sjen litte

yn in minske fan fleis en bloed,

dy’t ús fertroud makket mei Jo,

Jezus, ús broer,

hjoed en alle dagen dy’t komme.

Amen.

Gebed fan ’e snein

Jo, dy’t in freon wêze wolle

foar allegearre dy’t jo Namme heechhâlde,

lit de tiid komme

dat jo beloften wier wurde

en stjoer Him yn ús fermidden,

dy’t ús oerein hâldt

as hearren en sjen ús fergiet,

en de wrâld skoddet

ûnder ûnrjocht en geweld

hjoed en alle dagen dy’t komme.

Amen.

Eingebed

Hoeder fan alle libben,

dy’t ús by de namme ken,

lit jo skepping

op ’e nij berne wurde

en meitsje in ein oan de nacht

dy’t de wrâld fertsjusteret.

Stek yn ús fermidden jo ljocht oan

yn in minske dy’t rjocht docht

en ús sjen lit mei nije eagen:

Jezus Messias, ús rêder,

hjoed en alle dagen dy’t komme.

Amen.