Protestantse Kerk
Trochgean nei de haadynhâld
Fynplak fan leauwe, hope en leafde
subline-curl
Tsjinstboek

Fjirde snein fan Advint

paars

Gebed fan ’e snein (jier A-B-C)

Kom, o God,

mei jo macht nei ús ta.

Stean neist ús,

mei de krêft fan jo goedens.

Lit net ta

dat jo wil wjerstien wurdt

troch wat wy dien hawwe

en oerwin troch jo leafde

alles wat Jo tsjinstiet

en jo takomst opkeart.

Gebed fan ’e snein

Ivige God,

fan wa’t de ierde is en alles wat derop libbet,

iepenje ús herten

om de tekens te ferstean

dêr’t Jo ús yn sjen litte

wat jo bedoelings binne.

Lit ús yn dizze oere sjen

hoe’t wy de hope fêsthâlde kinne

by alles wat oer ús komt,

om’t Jo by ús binne

hjoed en alle dagen dy’t komme.

Amen.

Eingebed

God fan Abraham, Izaäk en Jakob,

wy tankje Jo

foar de wurden en de tekens

dy’t ús de dei oansizze

dat jo keninkryk komt.

Wy tankje Jo benammen om har

út wa’t it ljocht fan de wrâld

foar ús begûn is te skinen: Maria,

dy’t segene is ûnder de froulju.

Jou dat wy allyksa

yn jo beloften diele meie,

hjoed en alle dagen dy’t komme.

Amen.

Gebed fan ’e snein

Jo, dy’t jo tinte opsette wolle

om by ús te wenjen,

iepenje ús de eagen

foar de Boadskipper fan jo frede

dy’t it ljocht fan ’e wrâld is,

it Wurd út jo mûle.

Meitsje ús frij

om yn it bern fan de faam

Him te begroetsjen

yn wa’t jo beloften wierheid wurde:

Jezus Messias,

hjoed en alle dagen dy’t komme.

Amen.

Eingebed

Jo Alderheechste,

foar wa’t neat ûnmooglik is,

ferhear ús gebeden

en meitsje in ein oan it tsjuster

dat ús finzen hâldt.

Meitsje de wrâld ta jo wenning

om ’e wille fan allegearre

dy’t heil ferwachtsje fan jo wurden,

hjoed en alle dagen dy’t komme.

Amen.

Gebed fan ’e snein

Jo, dy’t de ierde

fruchtber meitsje

troch de dauwe en de rein

fan jo Wurd,

iepenje ús allegearre foar jo libbenskrêft

en kom ús temjitte

yn de Soan fan Maria

dy’t it bewiis is fan ús fertrouwen

yn jo ferbûn mei ús,

dat ivich duorje sil.

Amen.

Eingebed

Hoeder fan minsken,

dy’t ús libben bewarje wol,

wy tankje Jo

dat it lytse foar Jo net te min is

om jo trou oan ús bekend te meitsjen.

Jou dat wy ús hope hâlde op Jezus, de soan fan Maria,

en dat wy yn syn fuotprinten

it libben yngean meie,

hjoed en alle dagen dy’t komme.

Amen.