Protestantse Kerk
Trochgean nei de haadynhâld
Fynplak fan leauwe, hope en leafde
subline-curl
Tsjinstboek

Tredde snein fan Advint

pears

Gebed fan ’e snein (jier A-B-C)

Sjoch nei ús om, o God,

en harkje nei ús bidden.

Wês ús genedich

en kom nei ús ta.

Lit de sinne fan jo gerjochtichheid

einlings opgean

oer ús hjir op ierde

en oer ús fertsjustere bestean.

Gebed fan ’e snein

Jo, dy’t blinen de eagen iepenje

en brutsen minsken oerein helpe,

hifkje ús geduld net langer,

mar rêd ús en bliuw by ús.

Befêstigje jo ferbûn

dat ús libben fernijt en blydskip jout,

hjoed en alle dagen dy’t komme.

Amen.

Eingebed

Jo, dy’t jo Wurd trou bliuwe

en minsken rjocht dogge,

bewarje ús by jo Wurd

en lit jo Soan de boade wêze

dy’t ús de wei wiist nei in wrâld

dêr’t Jo sels ús ljocht binne

en dêr’t jo tasizzingen wierheid wurde:

rjochtfeardige frede foar allegearre,

hjoed en alle dagen dy’t komme.

Amen.

Gebed fan ’e snein

Jo, dy’t mei minsken begien binne,

kom en fernij de ierde

troch it ljocht dat skynt yn Jezus,

jo warleaze tsjûge.

Lit ús harkje nei syn stim

en Him folgje yn de leafde foar minsken

dêr’t Hy ús yn foargien is,

hjoed en alle dagen dy’t komme.

Amen.

Eingebed

Jo, dy’t antwurdzje

ear’t wy ta Jo roppe,

lit jo ljocht opgean

oeral op ierde

dêr’t minsken heil ferwachtsje.

Meitsje in nij begjin

en wiis ús de goede wei

fan Jezus jo Soan.

Diel ús jo blydskip mei

en meitsje ús ta wurkers

fan barmhertichheid en leafde,

hjoed en alle dagen dy’t komme.

Amen.

Gebed fan ’e snein

Jo, Hoeder en Rêder fan minsken,

dy’t de wrâld bliid meitsje

en minsken ta inoar bringe

yn rjochtfeardige leafde,

lit ús jo leafde sjen

as wy nei jo wurden harkje

en stjoer ús de Boade fan jo trou:

Jezus, ús broer,

de boarne fan hope foar alle minsken,

hjoed en alle dagen dy’t komme.

Amen.

Eingebed

Jo, dy’t by ús wenje wolle,

harkje nei it roppen fan jo minsken

en lit jo ljocht oer ús opgean.

Jou de wrâld hope op frede

en trúnje ús ta dieden oan

yn trou en leafde foar minsken

om ’e wille fan Him dy’t ús leafhat:

Jezus Messias, jo Soan,

hjoed en alle dagen dy’t komme.

Amen.